J’guérine d’impatiènche


Frettetchuiche, el 13 ed Sectimbe 2016

 

Min boin Fleurimond,

Nous vlo déjo au mitan du moés d’Sectimbe, et pi j’ai rchu din no boéte à lette éch prougramme
d’éch Festival du Pipasso, à Flichcourt, au bout du moés.
Ej n’arrivoais point à l’croére, tellemint qu’j’étoais émotionnèe, ertornèe conme inne querpette din
inne poéyelle : tu sros là-bos, Ti, aveuc ét castchette, tes leunettes, tin pénier, pi tes moustaches,
qu’o diroait inne tcheue d’hirondelle ed printemps !
Ej n’in guerlotte, ej n’in frichon-ne, j’én n’ai des froumion din mes cotrons !
J’ém sintoais tellemint drôle qu’il o follu qu’éj prinche min pipasso pi qu’éj souffe éddin pour povoér
ém rapurer un tchot molé.
Tu pinses : édpi qu’o n’nos sonme point rvus ! J’n’in tran-ne d’avanche, surtoute qu’i vo y avoér
tellemint d’mon-ne !
Ej sais qu’tu n’es point un fort causeu, mais tes zius i n’mint’té point : éj sais ch’qué j’ai li d’din l’énèe
passèe à Dourlin !
Et pi d’preu intin-ne dire, d’apreu ch’qué chés gins i dit’t un molé tout partoute, à ch’qu’i péroait
qu’t’éroais din l’idèe qu’o nos fiançonche, publiquemint !
Ej n’ose point d’trop reuver, mais o m’o glinchè din ch’treu d’émn eureille éq t’éroais meume muchè
un énieu* din t ‘poche éd casaque pour m’él l’infitcher à min doét !
Et pi Rémy ch’Satcheu d’Pont-R’my qui sroait lo étou pour foaire él témoin !
Ej sais bien qu’él langue éd chés gins, ch’est conme él tcheue d’chés tchiens : a berloque toudi !
Mais n’impèque qu’éj sins conme inne doucheur qu’al gonfe ém poétrin-ne, pi qu’a m’rimplit
d’espoér.

In attindant, éj compte chés jours, et pi j’guérine d’impatiènche !

Un bé su t’mouse, min Fleurimond,
Étn’ Alphonsine, épinèe conme inne jon-ne agache* !

Enieu : anneau
Epinèe conme inne jon-ne agache : nerveuse, impatiente come une jeune pie