Min Fleurimond, min Long Minton


Frettetchuiche, el 16 du moés d’Avri 2016

 

Min Fleurimond,
Min Long Minton,
Min Long Poérion,

In-nhui, ch’boin temps i s’dessaque éd tout partoute : ch’solé i mile conme inne taque éd mié din ch’temps tout bleu, chés fleurs, chés abes i s’épénit’t, chés moénieux i pip’t, i siff’t, i can’t, i guerjol’t.
A vir tout o, à intin-ne tout o, min tchoeur i s’gonfe din m’forté poétrin-ne !

Qué plaisi d’vive, et pi d’savoér éq tu pinses à mi !

Voés-tu, j’ai mis gramint du temps, mi étou, dvant d’ét répon-ne, mais tu sais bien éq pour nous-eutes, chés Gayants, éch temps ch’est point l’meume éq pour ézz’eutes, chés gins normals pi ordinaires.
Tu sais éq quante j’ai rchu t’lette (t’os inne si belle pleume, min Fleurimond !), éj n’in croéyoais point mes zius ! Min tchoeur i butchoait indsous d’min caraco ! J’avoais de froumions din mes gambes !
Il o follu qu’éj prinche min pipasso pour canter min bonheur per-dessus chés cortis pi chés haillures !
Ech mon-ne i s’éclairoait d’inne nouvelle leumiére, tellemint pu douche ! Ech mon-ne il étoait bieu, à nouvieu !
J’ai sarrè t’missive su min tchoeur. J’él l’ai li, et pi rli, j’én sais point cobien d’coeups.
J’n’in rvénoais point ! Pi quelle histoére, aveuc éch Tatave, éch garchampéte ! Coér bien qu’t’os ieu l’idèe d’él suire, et pi qu’Natole (qu’éch Bon Diu il lé béniche !) i t’euche infin rapportè m’lette.
Mon diu manman, qué tranfic !

J’én n’ai mis du temps à m’rapurer, tellemint qu’j’étaois ébeubie, éberloufrèe, ertornèe à l’invers !
Ém main al tran-ne coér un tchot molé pour t’invoéyer chés quiques mots-lo.
Éj sais qu’à ch’momint-chi tu doés avoér gramint d’ouvrage din tin gardin : fouir, étreumer fyin, ésmer, démérier… et pi qu’au soér tu doés-t-éte rudemint rcran, aveuc tes reins doreux.
Mais i janmoais t’os chonq minutes intré-deux, pinse à mi, pi invoèe-m’mé (éj n’in rougis érien qu’d’y pinser !), invoèe-m’mé un tchot plé d’mudjet éd tin gardin pour éch preume du moés d’moai !
Un gros bé à pinchette su l’bout d’tin nez, min Fleurimond, éch Gayant d’min tchoeur !

Étn Alphonsine qu’al reuve éd ti !