Em chère Alphonsine,
Vlo un biau roéyon d’solé par ch’cassi ed min forni qui récauffe un tchuin d’el tabe. Ch’est l’occasion por mi ed prinde el pleume pi mn’écritoére por réponde (infin, tu vos m’dire !) avu l’clarté à t’tchote bafouille.
Achteure, Phonsine, tu n’vos point n’in croère tes érelles ! Laiche-mé t’esplitcher porquoè eq min voésan Natole i m’o baillè l’inveloppe avu tes boins vux y o seulmint qu’troés jours ! Edvint un mystére parel, j’o foait conme Hertchule Poérion : inne tchote intchète à travers min village, por n’in définir qu’eune lette por mi al avoait finite din s’boéte à li !
Au preume, inne visite à Mimir, no facteur : ej l’o ertrouvè din sin lit, avu ses gambes in l’air, edpi pu d’un moés, intorsillèes din un morcieu d’plate por li rafistoler ses os berzillès. Un molé moneu, i m’conte s’misère :
Au mitan d’janvier, s’tornèe finite, i s’tape din Logomme, ch’péqueu, qu’il avoait déjo un pied din ch’débit d’boéssons ed Fifine. Ni eune, ni deusse : intrinnè par sin meudit camarate, vlo Mimir qui cminche à fêter l’dipleume ed sin fiu Tutur, qu’il o étè prins ingénieur dine une fabrique d’automeubiles à Péris.
Ej voés l’tableau d’ichi : à l’sinté ed tous chés Saints dol commune, pi à tous chés pichons dl’Uthie !...
A l’nuit tombèe, pu noére eq jamoais, il inforque sin vélou pour rintrer in zigzag à s’moéson. L’malheur i n’o point tardè ! A ch’croésemint dol grand route pi dol rue d’ech chinmtiére, il o foait l’tchulbute avue une auto dol fabrique in tchestion ! Ratatinè din ch’fossé, il l’o écapè belle ! Coér un peu, pi chés pompiers iz auroèt’t ieu qu’à traverser l’rue por l’mette din s’dragnière demeure !
Pi j’apprinds eq Tatave, no garde-champête, il o étè nonmè por l’rimplacher jusqu’o qu’i fuche rétampi. J’o ieu l’idiée dol suire l’jor d’apès, por zieuter si l’nouvieu traval d’ech phunomène-lo il étoait bien convenabe. Pi lo, Phonsine, eussi vrai eq min long minton, j’o erbéyè à ch’miraque du travail bin foait ! Ch’ferlapier-lo, por finir rade-rade s’tornèe, i mettoait totes chés lettes d’eune minme rue din l’premiére boète, comptant su l’bienhéreux paroéssien por foaire l’distribution à chés voésans !
Seulmint, min voésan à mi, à l’intrée dol ruelle d’ech Marais, ch’viu Natole, i n’étoait point lo ! Il avoait tchitté s’moéson por passer chés moés d’hiver chez sin fiu, din l’Sud, à Minton, à cause eq ses rhomatiques i ll’ertraval’t moins din un climat sec. J’in o été tout ébeubi tant qu’à sin tour i m’o apporté à sn’habitude eune cagette ed citrons, avu l’tchote lette infin rindue à sin destinataire !
Au matan, à l’moéson dol Papeterie, por acater eune nouvielle pleume por t’écrire, j’conte tote l’histoére à ch’fameux Tutur, r’vnu d’Péris vir sin malheureux père pi li acater ch’jornal. Ch’brave Tutur, qu’il o ed l’estruction, i m’esplique eq ch’est à cause ed l’effet Papillon !
Logomme i n’auroait point « forché » sin père à rintrer din ch’cabaret, em lette a n’auroait point tint traîné in cmin ! « Achteure, ti eussi, Tutur, i n’falloait point avoér tin dipleume ! », eq j’li rinfique !
O n’in rit coér ed boin tchoeur, m’tchote Alphonsine, mais quind même ! Ch’est aladon eq Logomme i li auroait arraché ses ailes à ch’biau papillon eq tu m’os invoéyé !
Ej n’auroais jamoais osé pinser eq tu m’avaois rmartché au mitan ed tous chés eutes gayants… A Dorlin, por emn’âge, tu n’os point arrêté ed souffler din tin pipasso por foaire dinser tertous… Ch’étaoit eune musique douche à min tchoeur !
A min tour, j’te sohaite ch’miu, avu l’boin temps qui pointe sin nez, coér pu timide eq mi !
A tin preuchain bal, j’auroais plaisi à guincher avu ti, pi à t’offrir ed biaux lédjinmes ed min gardin, qui n’fleurit eq por ti, em tendre Alphonsine.
Bé à ti,
Tin Fleurimond