Min FLEURIMOND,
Min GRAND,
Ej sais bien qu’a n’est point convenabe, qu’a n’sé foait point, éq ch’est point à chés feumes éd foaire él premier pos, éd foaire "des avanches", conme chés gins maouais i dit’t.
Mais voés-tu, a foait troés smaines achteure éq tous les jours au matin, in m’dessatchant d’min lit, éj m’in vos, in camisole, à nn’attraper min crac, vir à m’boéte à lettes.
Et pi lo, éj m’appreuche : tout duchmint, min tchoeur tran-nant d’espoér din m’ forté poétrin-ne, ém bouque sèque, min guigui sarrè, mes gambes qui guerlot’t, mes boéyeux qui jut’t à tchilles, j’ouve chol boéte... et pi... point rien !
A chaque foés : point rien !
J’échue min nez, j’échue mes zius, et pi j’rinte à m’moaison, foaire min tchot bourgage... mais ch’n’est pu cho : voés-tu, éj n’ai pu l’tchoeur à rien.
Portant, tu sais, i m’avoait san-nè qu’à Pont-R’my, l’énèe passèe, à ch’baptême à Rémy ch’Satcheux, et pi surtoute à Dourlin pour étn’âge (80 ans, mon diu, qué bel âge : in pleine forche !), i m’avoait san-nè éq tes zius (si bieux, tellemint bieux !) i miloait’t éd plaisi quante tu m’erbéyoais. Et pi des zius, a n’mint mie !
Adon, ch’est in tran-nant un molé qu’éj prinds m’pleume in-hui pour ét sohaiter inne boéne énèe, inne boéne santè, pi gramint d’poérions din tin pénier !
Un bé su tin nez :
ét tchote Alphonsine qu’al pinse à ti.
PS : j’ém dis éq pétète tu nn’os l’invie, mais qu’tu n’oses point, alors, éj t’él dis du fond d’min tchoeur : Ose, min Fleurimond, Ose, min Gayant, Ose !