Tchultive tin gardin, tchultive étn’esprit !

Oui, min Fleurimond, j’comprinds : t’os tellemint d’coses à foaire à ch’momint-chi !

Y o tellemint d’ouvrage din ch’gardin : un coeup d’ratissoére ichi, un coeup d’louchet lo. Et pi chés pleuves qui tchèt’t à n’in pu finir !

Ej sais qu’i feut qu’tu réuchiches, min gardinier, min artiste : chés pu bieux lédjeumes, chés pu bieux tableus !

Ch’est t’fiertè, ch’est conme o : tu n’peux point t’én n’impétcher, est pu fort éq ti ! Ch’est in d’din d’ti inne forche qu’a t’pousse à foaire tojours miu !

Et pi, ej sais étou qu’t’es pu adroét aveuc tin fourtchet qu’aveuc un porté-pleume ! (T’in foais point, én cange érien : ch’est conme o qu’t’es l’pu tchèr à min tchoeur !)

Et pi qué fiertè din tes zius (tes zius si bieux pèr drière tes carrieux, min Fleurimond !), qué fiertè d’vir din tin pénier chés pu belles feuvettes*, chés pu bieux tchots-poés, chés pu bieux tabagas !

Ej sarre coér su m’poétrin-ne, qu’a n’in tran-ne éd plaisi, éch "TABAGA d’OR" éq t’avoais déhotchè* l’énèe passèe.

J’él l’aflate* su min tchoeur, et pi j’reuve, o bien j’prinds min pipasso pour canter l’impatiènche éq j’ai d’t’ervir, pi qu’o fuchonche insan-ne !

In attindant, fouis, min Fleurimond, fouis* !

Tchultive tin gardin, tchultive étn’esprit !

Et pi n’m’oblie point !

Un pénier d’pinsèes pour ti :

Alphonsine

feuvettes : haricots / déhotchè : décroché / aflate : caresse / fouis ! : bêche !